Naxçıvan Muxtar Respublikasının Ali Məclisinin sədri cənab Vasif Talıbov hazırlıq prosesi ilə yaxından tanış oldu

Naxçıvan Muxtar Respublikasının Ali Məclisinin sədri Vasif Talıbov Naxçıvan Dövlət Universitetində yaradılacaq Cisco Şəbəkə Akademiyası ilə bağlı hazırlıq prosesi ilə yaxından tanış oldu. Tanışlıq prosesi Naxçıvan Dövlət Universitetinin Memarlıq və Mühəndislik Fakültəsinin açılışı zamanı baş vermişdir. AzNET layihəsinin rəhbəri Murad Maksudov Naxçıvanın Ali Məclisinin sədri Vasif Talıbova Cisco lokal şəbəkə akademiyasının fəaliyyət istiqamətləri haqqında ətraflı danışdı. V.Talıbov bu tədris mərkəzində keçiriləcək treninqlər, hazırlanacaq mütəxəssislərin iqtisadiyyatın müxtəlif sahələrində fəaliyyət perspektivləri haqqında məlumat aldı. Naxçıvanın rəhbəri həmçinin lokal akademiyada işləyəcək kollektiv ilə də tanış oldu və onların üzərində böyük məsuliyyət olduğunu qeyd etdi.

Naxçıvan Dövlət Universitetinin nəzdində fəaliyyət göstərəcək Cisco Lokal Şəbəkə Akademiyasının açılış mərasimi İyun ayında Naxçıvanda keçiriləcək "Elektron Naxçıvan" konfransı zamanı həyata keçiriləcəkdir. Bu lokal akademiya üçün texniki avadanlıq Cisco şirkəti tərəfindən təmənnasız təqdim olunmuşdur. İnzibati dəstək və təlimatçıların hazırlanması isə NATO-nun Elmi Proqramı tərəfindən həyata keçirilmişdir. Lokal akademiyanın yaradılması üzrə təşkilati fəaliyyətləri isə Azərbaycanın Rabitə və İnformasiya Texnologiyaları Nazirliyi, BMT-nin İnkişaf Proqramının, AzRENA təşkilatının birgə həyata keçirdiyi "Tədqiqat, Təhsil və Vətəndaş Cəmiyyətinin İnkişafı Məqsədləri üçün İnternetə Çıxış və İnfrastrukturun İnkişaf Etdirilməsi" (AzNET) layihəsi həyata keçirir.

Qeyd etmək lazımdır ki, dünyanın 150-dən artıq ölkəsində fəaliyyət göstərən və sayı 11 000-dən artıq Cisco Şəbəkə Akademiyalarında artıq 1,6 mln. tələbə təhsil almışdır. Azərbaycanda AzNET layihəsi çərçivəsində artıq 12 Cisco Lokal Şəbəkə Akademiyası yaradılmışdır.