Azərbaycanda ilk Kompüter Qəzalarına Cavabvermə Komandası (Computer Emergency Response Team - CERT) fəaliyyət göstərir. CERT komandası Azərbaycanın Rabitə və İnformasiya Texnologiyaları Nazirliyi və BMT-nin İnkişaf Proqramının "Tədqiqat, Təhsil və Vətəndaş Cəmiyyətinin İnkişafı Məqsədləri üçün İnternetə Çıxış və İnfrastrukturun İnkişaf Etdirilməsi" (AzNET) layihəsi çərçivəsində NATO-nun Elmi Proqramının maliyyə dəstəyi ilə yaradılmışdır. CERT-in məqsədi kompüter şəbəkələrinə, informasiya sistemlərində olan müxtəlif təhlükəsizlik qəzaların qarşısının alınması, informasiya təhlükəsizliyinin təmin olunmasıdır. NATO Elmi Proqramının dəstəyi ilə CERT komandaları Rusiya istisna olmaqla bütün MDB ölkələrində yaradılmışdır. Bu CERT komandalar arasında sıx əlaqələndirmə mövcüddür.

Komandanın əlaqələndiricisi Emin Axundovun sözlərinə görə, Azərbaycanda yaradılmış CERT-in əsas məqsədi AzNET şəbəkəsinin qorunması, kompüter qəzalarının qarşısının alınmasıdır. AzNET şəbəkəsinə qoşulmuş orta məktəblərin, kitabxanaların, qeyri-hökumət təşkilatlarının informasiya şəbəkələrinə əgər hücum olarsa, onda CERT komandası zəruri tədbirlər görür və hücumun qarşısını alır. E.Axundov qeyd etdi ki, CERT komandası həmçinin şəbəkələrdə müxtəlif virus proqramlarını da üzə çıxarmaq kimi profilaktika ilə də məşğuldur.

E.Axundov hesab edir ki, belə CERT komandalar bütün internet-provayderlərin, dövlət strukturlarının, özəl şirkətlərin, təhsil ocaqlarının nəzdində yaradılmalıdır. Bu praktika bütün dünyada mövcüddür. CERT komandalarının bir xüsusiyyəti də onlar arasında effektiv əlaqələndirmə funksiyasının olmasıdır. Belə ki, bu və digər şəbəkədən hücum olarsa, həmin şəbəkənin CERT komandası ilə əlaqə quraraq hücumun qarşısını almaq olar.

Azərbaycanın CERT komandası MDB məkanında yüksək peşəkarlığı ilə seçilir. Maraqlıdır ki, Azərbaycan CERT komandasının nümayəndəsi Emin Axundov NATO-nun Elmi Proqramının Şərqi Avropa ölkələrində CERT komandalarının yaradılması istiqamətində keçirilən seminarda Hollandiya və Polşa mütəxəsissləri ilə birlikdə təlimçi statusunda iştirak etmişdir.