BMT-nin İnkişaf Proqramı və "Tədqiqat, Təhsil və Vətəndaş Cəmiyyətinin İnkişafı Məqsədləri üçün İnternetə Çıxış və İnfrastrukturun İnkişaf Etdirilməsi" (AzNET) layihəsi tərəfindən həyata keçirilən "Şəbəkə infrastrukturu" layihəsi NATO-nun Elmi Proqramı tərəfindən yüksək qiymətləndirildi. "Şəbəkə infrastrukturu" layihəsi NATO-nun Elmi Proqramının maliyyə dəstəyi ilə həyata keçirilmişdir.

Layihənin NATO Elmi Proqramı tərəfindən əlaqələndiricisi, Kembric universitenin İnformasiya təhlükəsiziliyi tədqiqat qrupunun rəhbəri Rafal Roqozinski Azərbaycana səfər zamanı görülmüş fəaliyyətlərin monitorinqini keçirmiş və əldə edilmiş nailiyyətlərə yüksək qiymət vermişdir.

Qeyd etmək lazımdır ki, "Şəbəkə infrastrukturu" layihəsinin məqsədi Azərbaycanın Gəncə şəhərində təhsil və ictimai sektoru üçün yüksək keyfiyyətli fiberoptik şəbəkənin yaradılmasıdır. Görülmüş işlər nəticəsində bu şəhərin 6 ATS-ini əhatə edən və 100-ə yaxın orta məktəbi, ali məktəbi, təhsil müəssisəsini, kitabxanaları, qeyri-kommersiya strukturlarını birləşdirə bilən yüksək sürətli şəbəkə qurulmuşdur. Hal-hazırda bu şəbəkəyə təhsil müəssisələrinin qoşulması prosesi gedir.