NATO-nun Baş Qərargahının Şəbəkə Təhlükəsizliyi üzrə proqram direktoru xanım Xadassa Yakobovits "Tədqiqat, Təhsil və Vətəndaş Cəmiyyətinin İnkişafı Məqsədləri üçün İnternetə Çıxış və İnfrastrukturun İnkişaf Etdirilməsi" (AzNET) layihəsinin ofisində layihənin rəhbərliyi ilə görüş keçirmişdir. Görüş zamanı xanım X.Yakobovits AzNET layihəsinin təhsil və elmi tədqiqat şəbəkəsi haqqında məlumat almış və bu şəbəkənin inkişaf perspektivləri haqqında fikir mübadiləsi aparmışdır.

AzNET layihəsinin işçi heyəti görüş zamanı AzNET layihəsi çərçivəsində həyata keçirilən təşəbbüslər haqqında qonağa məlumat vermişdir. Bu təşəbbüslər arasında AzNET layihəsi tərəfindən həyata keçirilən Şəbəkə İnfrastruktur Qrantları, CİSCO Şəbəkə Akademiyası proqramı, E-Riders təşəbbüsü barəsində məlumat təqdim olunmuşdur. Eyni zamanda, AzNET tərəfindən Azərbaycanda yeni inkişaf etdirilən CERT (Computer Emergency Response Team) təşəbbüsü də diqqət mərkəzində olmuşdur. Qeyd etmək lazımdır ki, layihənin işçi heyəti qeyd olunan CERT təşəbbüsü çərçivəsində bir sıra Avropa ölkələrində təlim keçərək, AzNET-in bazasında layihənin şəbəkəsinə qoşulmuş təşkilatlara CERT xidməti göstərirlər. Hazırda, AzNET Layihəsi tərəfindən CERT təşəbbüsünün genişləndirilməsi və təkmilləşdirilməsi sahəsində işlər aparılır. X.Yakobovits həmçinin AzNET layihəsinin şəbəkə təhlükəzisliyi qrupunun işi ilə də tanış olmuş və qrupun üzvlərinin peşəkar səviyyəsini yüksək qiymətləndirmişdir.

X.Yakobovits qeyd etmişdir ki, informasiya təhlükəsizliyi müasir durumda çox böyük əhəmiyyət kəsb edir və AzNET tərəfindən bu məsələyə yüksək diqqətin verilməsi olduqca təqdirə layiq bir haldır.

Sonda, tərəflər gələcək əməkdaşlığın perspektivləri və imkanları barəsində fikir mübadiləsi apardılar.