Layihəni həyata keçirən bütün qurumlar bu sektorda çox geniş təcrübəyə malikdirlər. Bunu həm Hökumətin İKT sahəsində qabaqcıl tərəf müqabili olan BMTİP, həm də bu konkret sektorda illər boyu fəaliyyət göstərmiş və təcrübə toplamış ACİ-YF və AzRENA haqqında söyləmək olar. Yeni yaradılmış nazirlik layihədə hökuməti təmsil edəcək.

Layihə Milli İcra (NEX) prosedurlarına əsasən həyata keçiriləcək. Layihənin həyata keçirilməsi Rabitə və İnformasiya Texnologiyaları Nazirliyi, BMTİP, AzRENA və ACİ-YF arasında həm donorlar, həm də strateji tərəf müqabilləri şəklində yaxın əməkdaşlıq sayəsində təmin olunacaqdır. BMTİP-nin bu layihəyə qatılması onun institusional potensialın artırılması sahəsində imkanları, həmçinin, təcrübə və texnologiyalara yiyələnmə prosesinin təşkilinə dair əvvəlki təcrübəsi ilə bağlıdır. İKT sektorunun bu konkret seqmentinə dair ACİ-YF-nun geniş təcrübəsi, AzRENA-nın institusional potensialı və onların layihəyə cəlb olunması tərəflərin əməkdaşlığı nöqteyi nəzərindən çox vacibdir. Layihənin əməliyyat fəaliyyətinə başlandıqdan sonra 12 ay müddəti ərzində, layihə müstəqil beynəlxalq ekspert qiymətləndirilməsi keçiriləcəkdir.

Rabitə və İnformasiya Texnologiyaları Nazirliyi hökumət adından tərəf müqabili olaraq layihənin həyata keçirilməsi üçün ondan tələb olunan bütün xidmətləri təmin edəcəkdir. Nazirlik layihə konteksti daxilində həyata keçirilən bütün texniki missiyalara və ekspert fəaliyyətinə dəstək göstərəcək, əlaqədar fəaliyyət növlərinin həyata keçirilməsinə kömək edəcək və layihənin icra olunduğu sahələrə səfərləri, müvafiq məlumatlardan, sənədlərdən istifadə etməyi, agentliklər və hakimiyyət orqanları ilə əlaqə yaratmaq imkanlarını təmin edəcək, həmçinin telekommunikasiya xərcləri məsələlərində layihəyə yardım edəcək. Layihə, nazirlik tərəfindən, layihənin uğurlu həyata keçirilməsi məqsədilə, ödənişsiz və yaxud münasib qiymətlə nazirliyin infrastrukturundan istifadə etmək imkanından da bəhrələnəcək.

Layihənin icrası Rabitə və İnformasiya Texnologiyaları Nazirliyi, AzRENA, ACİ-YF və BMTİP nümayəndələri tərəfindən birlikdə yoxlanılacaq. Yoxlama layihənin müddəti zamanı ildə iki dəfə aparılacaqdır. Layihənin Milli Əlaqələndiricisi yoxlamadan iki həftə əvvəl hazırlanmalı Layihə üzrə İllik Hesabatı yoxlama üzrə iclasda təqdim edəcək. Birgə yoxlama üzrə iclasda nəzərdən keçirilmək üçün layihənin yekun hesabatı hazırlanacaqdır. Layihənin monitorinqi və qiymətləndirilməsi BMTİP-nin Milli İcra prosedurlarında göstərilmiş müddəalara uyğun olaraq yerinə yetiriləcəkdir.

Tərəflərin hər biri, Rəhbər Komitədə iştirak etməklə, layihənin mənfəətsiz fəaliyyət göstərməsini, layihə üçün nəzərdə tutulmuş material və digər resursların lazımi qaydada istifadə olunmasını təmin etmək niyyətini bəyan edir. Əlaqələndirmə, Layihənin monitorinqi, strateji idarə edilməsi və şəffaflığı, həmçinin, Rəhbər Komitə tərəfindən həyata keçiriləcəkdir. Layihənin bütün mərhələlərdə icrasının açıq və iştiraklı yoxlanması və monitorinqini təmin etmək üçün, layihədə iştirak edən 4 tərəfin hər biri 1 nümayəndə təqdim etməklə Rəhbər Komitə yaradılacaq. Rəhbər Komitənin iclasları birgə yoxlama üzrə iclaslar ilə eyni zamanda keçiriləcəkdir. Eyni zamanda layihədə iştirak edən hər bir tərəf lazım olduğu təqdirdə, 3 iş günü öncədən xəbərdarlıq edərək, Rəhbər Komitənin növbədənkənar iclasını çağırmaq hüququna malikdir. Rəhbər Komitə tam yekdilliklə qəbul olunmuş qərarlar əsasında fəaliyyət göstərəcəkdir. Layihənin ümumi nəzarəti Hökumət tərəfindən təyin edilmiş Milli Əlaqələndirici tərəfindən həyata keçiriləcəkdir.

Müsabiqə əsasında seçilmiş Layihə Direktorunun vəzifəsi layihənin gündəlik idarə edilməsindən ibarət olacaq. Eyni zamanda maliyyə üzrə köməkçi (1 ştat vahidi), inzibati məsələlər üzrə köməkçi (1 ştat vahidi) və bir sürücü, həmçinin, müsahibə vasitəsilə seçiləcəklər. Eyni zamanda, Layihənin Direktoru, həmçinin, şəbəkələrin qurulması və məlumatların emalı sahəsində geniş biliklərə malik olan ekspertlərdən ibarət texniki heyətin işinə rəhbərlik edəcək. Layihənin Direktoru layihəyə aid olan donor/strateji tərəf müqabilləri ilə yaxından əməkdaşlıq edərək, layihənin Milli Əlaqələndiricisinə hesabat verəcəkdir. (əlavə edilmiş Texniki Tapşırığa baxın).

Layihənin qısa bir zamanda həyata keçirilməsini təmin etmək məqsədilə layihənin işçi heyəti işə cəlb olunacaq və Layihənin Direktoruna hesabat verəcək. Layihənin işçi heyəti layihənin tam şəkildə fəaliyyət göstərməsinə və layihə ilə əlaqəli məsələlərin çatdırılmasına görə məsuliyyət daşıyır. Layihənin icrası zamanı meydana çıxan cari məsələlər Layihənin Direktoru tərəfindən həll olunur. O, layihənin həyata keçirilməsinə dair maliyyə və digər sənədləri imzalamaq və Milli Əlaqələndiriciyə təqdim etmək hüququna malikdir və mütəmadi qaydada Rəhbər Komitə və Milli Əlaqələndiriciyə hesabat verir. Layihənin Direktoru ACİ-YF tərəfindən təqdim edilir.

Layihənin audit yoxlaması NEX layihələrinin auditi üzrə BMTİP-nin müvafiq Qaydaları və Prosedurlarına müvafiq olaraq keçiriləcəkdir.

Layihə idarəetməsinin təşkili, həmçinin, BMTİP tərəfindən maliyyələşdirilən layihələrin müvafiq qaydalarına əsasən qurulmalıdır və bu qaydalar BMTİP-nin müvafiq sənədlərində öz əksini tapmışdır. Layihə çərçivəsində əldə olunmuş nəticələrin səmərəli monitorinqini təmin etmək məqsədilə, layihə öz fəaliyyətinin ilk 6 ayı ərzində xüsusi göstəricilər/ məlumat sistemini tərtib edib, onu təqdim etməlidir.