2004-cü il mayın 27-də Hyatt Regency mehmanxanasının "Caspian B" zalında "Tədqiqat, Təhsil və Vətəndaş Cəmiyyətinin İnkişafı Məqsədləri üçün İnternetə Çıxış və İnfrastrukturun İnkişaf Etdirilməsi" Layihəsinin layihə sənədi imzalanmışdır. Layihə sənədi

• Azərbaycan Hökuməti adından Azərbaycan Respublikasının Rabitə və İnformasiya Texnologiyaları naziri, akademik, cənab Əli Abbasov
  
• BMT-nin rezident əlaqələndiricisi, BMT-nin İnkişaf Proqramının (BMTİP) rezident nümayəndəsi, cənab Marko Borsotti
  
• Açıq Cəmiyyət İnstitutu - Yardım Fondunun (ACİ-YF) icraçı direktoru, cənab Fərda Əsədov
  
• Azərbaycan Elmi-Tədqiqat və Təhsil Şəbəkələri Assosiasiyasının (AzRENA) icraçı direktoru, cənab Rasim Əliquliyev tərəfindən imzalanmışdır.

Layihə İnformasiya-Kommunikasiya Texnologiyaları üzrə Milli Strategiyaya uyğundur və Azərbaycan Hökuməti, ACİ-YF, BMTİP və AzRENA tərəfindən həyata keçiriləcəkdir. Donorlar haqqında daha ətraflı məlumatı burada ala bilərsiniz.

Üç il müddətində həyata keçiriləcək layihənin ümumi büdcəsi 1 milyon 286 min ABŞ dolları təşkil edir, və həmin məbləğdən 586 min ABŞ dolları - Açıq Cəmiyyət İnstitutu - Yardım Fondunun, 350 min ABŞ dolları - BMT-nin İnkişaf Proqramının, 350 min ABŞ dolları - Azərbaycan Elmi-Tədqiqat və Təhsil Şəbəkələri Assosiasiyasının payına düşür.

Layihə Azərbaycanda elmi-tədqiqat, təhsil və ictimai məlumat şəbəkələrinin davamlı inkişafı üçün şəraitin yaradılması və genişləndirilməsinə yönəlmişdir. Layihənin məqsədi təhsil, elm, İKT, vətəndaş cəmiyyəti, qeyri-kommersiya və mənfəətsiz ictimai sektorlarını təmsil edən bütün aidiyyəti tərəflərin səylərinin əlaqələndirilməsindən ibarətdir. Layihə ölkənin elm və təhsil sektorlarında, həmçinin xarici tərəf müqabilləri arasında məlumat təminatına yardım göstərəcək və istiqamətləndirəcək, və bununla da regionlar arasında və Azərbaycanın daxilində və xaricində maraqlı tərəflər arasında məlumat mübadiləsinə imkan yaradacaqdır. Layihənin daha bir vacib xüsusiyyəti onun bu sahədə fəaliyyət göstərən əsas iştirakçıları bir araya gətirməsi və onların səylərinin müvafiq sektor üzrə birləşdirilməsindən ibarətdir.